Ika-7 sa “Most Competitive Mid-Sized Cities” sa bansa
Lucena City kinilala ng Asian Institute of Management
By Jason Q. Vallecer

LUCENA CITY – Mula sa 22 lungsod sa bansa na tinanghal na Most Competitive Mid-Sized Cities ay kinilala ang Lucena City bilang pang-pito batay sa isinagawang pagsasaliksik ng Asian Institute of Management Policy Center.

Ang pagpaparangal sa mga napiling lungsod ang pinakatampok sa isinumiteng resulta ng Philippine Cities Competitiveness Ranking Program (PCCRP), isang programang ginagamit sa pagsasaliksik na isinasagawa ng AIM Policy Center at may layuning kilalanin ang mga lungsod sa bansa na mainam panirahan, pagtrabahuhan at pagtayuan ng negosyo.

Sa kanilang pagsasaliksik para sa taong 2007, nagsagawa ng survey ang AIM sa may 90 lungsod at ibinatay ang antas ng mga ito sa mga sumusunod na criteria: “dynamism of local economy”, “cost of doing business”, “infrastructure”, “human resources and training”, “responsiveness of LGU to business needs” at “quality of life”.
Nagpasasalamat naman si Lucena Mayor Ramon Talaga Jr. sa patuloy na suporta ng mga Lucenahin at mga empleyado ng pamahalaang panlungsod sa kaniyang mga programa at proyekto na siyang nagiging daan sa patuloy na pag-unlad ng lungsod ng Lucena.

“Makakaasa ang mga ito na mas pag-iibayuhin pa ng pamahalaang panglungsod ang pagbibigay serbisyo upang higit na maramdaman ang pag-asenso sa buong siyudad at nang makilala pang lubusan sa buong Pilipinas,” ani Talaga.

Ang mga napiling siyudad ay hinati sa tatlong kategorya: ang metro, mid-sized at small. Sa 90 lungsod ay 25 ang napili bilang top performing cities base sa mga itinakdang criteria.

Mula sa 25 napili, apat na lungsod ang nagmula sa National Capital Region, 11 sa Luzon, 4 sa Visayas, at 6 sa Mindanao. Ang top performing para sa metro cities category ay ang Davao, Lapu-Lapu, Makati, Manila, Marikina at Quezon City.
 
Mula sa 25 mid-sized cities, ang kasama ng Lucena na top-performing cities ay Cabanatuan, General Santos, Olongapo, San Pablo, Tagum at Tarlac.
Ang top performing cities naman mula sa 45 small-sized cities ay ang Bayawan, Calapan, Calbayog, Dagupan, Dipolog, Laoag, San Fernando (La Union), Malaybalay, Naga, Surigao, Tagbilaran at Tuguegarao.

Ang PCCRP ay isinasagawa kada dalawang taon sa buong bansa na naglalayong kilalanin ang mga mahuhusay na lungsod base sa kanilang pagpapaunlad ng ekonomiya at komersyo.