Sa isinagawang pagpupulong ng Marinduque Provincial Peace and Order Council ay
inilatag ni Senior Supt. Ismael Lapira, PNP Provincial Director ng Marinduque
ang datos ng criminality rate sa loob ng nakalipas na isang taon. Ikinatuwa
naman ni Marinduque Gov. Bong Carrion at ng bumubuo ng MPPOC ang napakababang
crime rate sa kanilang lalawigan... Nasa leadership lang po yan!
********
Bagamat tahimik at mapayapa ang lalawigan ng Marinduque ay problema pa rin
ngayon ang kakulangan ng pwersa ng kapulisan dito. Ayon kay Senior Supt. Lapira,
may isang bayan sa Marinduque na ang bilang ng kapulisan ay inaabot lamang ng
labing-anim kumpara sa dami ng barangay nito na kanilang binabantayan. Marami na
kasi sa kanilang kapulisan ang sumailalim sa early retirement...Calling PNP
Chief Avelino Razon, sir!
********
Nagbigay naman ng assurance si Senior Supt. Arturo Invento, Deputy Regional
Director ng PNP Reg. IV-B, na nakahanda silang mag-download ng karagdagang
pwersa ng mga kapulisan mula sa mga magtatapos ng scouting sa Camp Vicente Lim.
Ipinangako rin ni Senior Supt. Invento na ang ipapadala nila ay mga pulis na
lehitimong taga-Marinduque...Mas alam nga naman ng mga ito ang sarili nilang
lugar!
********
Bago matapos ang pagpupulong ay sinabi ni Gov. Carrion na hihintayin nila ang
ipinangakong karagdagang pwersa ng kapulisan na ipadadala ng PNP Regional Office
IV-B sa kanilang lalawigan. Nagbigay naman ng assurance si Invento sa gobernador
at idinagdag pa nito na kung kulang pa ang kanilang ipadadala ay magpasabi
lamang ang pamahalaang panlalawigan at kanila pa itong dadagdagan...Iyan ang
opisyal, may isang salita!
********
Sa naturan ding pagpupulong ay idineklara na ng Armed Forces of the Philippines
sa pangunguna ni Brig. General Roland Detabali, chief ng Army’s 2nd Infantry
Division, na insurgency free na ang lalawigan ng Marinduque dahil sa
pagkakalansag sa grupo ng mga rebeldeng nag-ooperate doon. Sinabi rin niya na
hindi magtatagal at itu-turn over na nila sa PNP sa lalawigan...It’s your turn,
ika nga!
********
Dumako naman tayo dito sa lalawigan ng Quezon. Kamakailan lamang ay pinaslang
ang isa nating kasamahan sa hanapbuhay sa bayan ng Sariaya. Ang hinanakit ng mga
kaanak ng biktima ay ang mabagal na pagresponde ng ating kapulisan samantalang
napakalapit naman umano ng detachment ng 415th PPMG sa lugar na pinangyarihan ng
krimen...Biro nga ni kasamang Kulas: “Pag pulis o opisyal ang inambush, mabilis
ang responde; Pero pag media, mabagal ang responde!”
********
Sa isinagawang follow-up operation ng binuong Task Force Sison ay nakahuli sila
ng dalawang lalaki na sinasabing positibo sa gun powder burns. Nahulihan din ang
mga ito ng baril. Ngunit sinabi naman ni Quezon PNP Director Senior Supt. Fidel
Posadas na hindi pa rin maituturing na suspek ang dalawa hangga’t hindi
lumalabas ang resulta ng ballistic report. Pero lumabas sa isang national TV
network na ang dalawa ang siyang itinuturong suspek...Ano ba talaga ang totoo,
PD?
********
Ayon kay Supt. Ed Somera, head ng Task Force Sison, hindi sila titigil hanggat
hindi nalulutas ang kaso ng pagpatay kay Bert Sison. Aniya, patuloy ang gagawin
nilang imbestigasyon upang matukoy kung sino ang nasa likod nang pagpaslang sa
nabanggit na broadcaster at mabigyan ng katarungan ang pagkamatay nito...Sana
nga, hindi lang puro imbestigasyon. Sana magkaroon ng positibong resulta!
********
Umaasa naman ang pamilya ng biktima maging ang mga mamamahayag sa lalawigan ng
Quezon na sa malao’t madali ay malulutas ang kaso. Kasabay na rin nito ang
pakiusap na sana’y maging transparent ang mga opisyal ng PNP sa lalawigan sa
kalalabasan ng imbestigasyon...At sana rin huwag na itong sawsawan ng mga
pulitiko!
For comments, suggestions and reactions, email me at jvallecer@gmail.com
